Powered by Google Translate
Automatic translation by Google Translate. We cannot guarantee that it is accurate.
Í söngnámi er röddin sjálf hljóðfærið. Hún er hluti af líkamanum og því einstök fyrir hvern einstakling og byggist mikið á heyrninni okkar. Í söngnáminu fást nemendur líka við túlkun á texta og framburð mismunandi tungumála.
Nemendur byrja yfirleitt seinna í söngnámi en í öðru tónlistarnámi og því misjafnt hvernig þekkingin á tónlist er þegar þeir hefja söngnám. Sumir hafa lært á hljóðfæri í mörg ár eða sungið í kórum meðan aðrir hafa ekki stundað tónlistarnám áður en þeir byrja að læra söng.
Í undirbúningsdeildinni fá ungir söngnemendur traustan grunn í raddtækni og beitingu raddarinnar. Þeir eru kynntir fyrir ýmsum stíltegundum tónlistar og fá að spreyta sig á margs konar tónlist. Nemendur fræðast um tónlist og flytjendur og vinna verkefni til að auka enn frekar við eigin þekkingaröflun.
Nemendur fá söngkennslu í tveggja til þriggja manna hópum. Meðleikur verður í boði til að þjálfa söngnemendur í samspili og fá þeir tækifæri til að koma fram og æfa sviðsframkomu í öruggu umhverfi. Auk söngkennslu og meðleiks sækja nemendur einnig vikulega tónfræðitíma og samsöngstíma.
Markmið klassíska söngnámsins er að kenna nemendum heilbrigða raddbeitingu, túlkun og framkomu. Námið skiptist í þrjú stig: grunnstig, miðstig og framhaldsstig. Námið er einstaklingsmiðað og því misjafnt hversu lengi nemendur eru á hverju stigi. Reikna má með að nemendur séu um 2 – 3 ár að meðaltali að ljúka hverju stigi.
Nemendur fá einkakennslu í söng klukkutíma á viku. Auk þess sækja nemendur tíma í undirleik, samsöng, tónfræði og tónheyrn. Nemendur þjálfast í að syngja með öðrum og að vera leiðandi í tónlistarflutningi.
Áhersla er lögð á að nemendur þjálfi sjálfstæð vinnubrögð og tileinki sér árangursríka námstækni. Nemendur fá tækifæri til að syngja á tónleikum og taka þátt í uppfærslum innan skólans og fá þannig þjálfun í sviðsframkomu og færni í að syngja fyrir áheyrendur.
Markmið rytmíska söngnámsins er að kenna nemendum heilbrigða raddbeitingu, túlkun, framkomu og míkrófóntækni. Nám í rytmískum söng skiptist í þrjú stig: grunnstig, miðstig og framhaldsstig. Námið er einstaklingsmiðað og er því misjafnt hversu lengi nemendur eru á hverju stigi en reikna má með að nemendur séu um 2–3 ár að meðaltali að ljúka hverju stigi.
Nemendur fá einkakennslu í söng klukkutíma á viku. Auk þess sækja nemendur tíma í undirleik, samsöng, tónfræði og tónheyrn. Spuni er stór þáttur í rytmísku söngnámi og þjálfast nemendur í þeirri tækni. Nemendur þjálfast í að syngja með öðrum og að vera leiðandi í tónlistarflutningi.
Áhersla er lögð á að nemendur þjálfi sjálfstæð vinnubrögð og tileinki sér árangursríka námstækni. Nemendur fá tækifæri til að syngja með rytmískum hljómsveitum, taka þátt í uppfærslum innan skólans og fá þannig þjálfun í sviðsframkomu og færni í að syngja fyrir áheyrendur.
